اليوم الاول

 اليوم الاول

يوم مانقلنا ف الشقة كنت مبسوط جدا بما اننا هننقل من الشقة الصغيرة الي احنا عايشين فيها لشقة كبيرة زي دي ، لكن مكنتش اعرف اني هشوف في الشقة دي أسوأ ايام حياتي!

انا اندرو ، عندي 16 سنة ، اكبر اخواتي ، عندي اختي الصغيرة ايملي 8 سنين واختي الكبيرة ايما 22 سنة ، الحالة المادية بتاعت والدي ووالدتي مكانتش تسمح اننا نقعد ف بيت كبير لكن الحمدلله اتحسنت وجينا البيت ده رغم سعرو القليل لكن البيت كبير جداً.

قبل مانبدا ننقل العفش للبيت لاحظت لراجل اخد بابا علي جمب وندهو عليا وبدأ يتكلم الراجل زي مايكون عاوز يخلص من حاجه محبوسة جواه ، اتفتح الراجل ف الكلام.

- طبعا زي مانتو شايفين حجم البيت ، بالنسبة لسعره ف اكيد سعره قليل ، ف انا عشان مقدرش اسكت لكن البيت ده حصل فيه جريمة قتل قبل كدا ، جوناثون وجيسي كانو زوجين جداد ف البيت من حوالي فترة مش كبيرة لكن مش قليلة بردو ، بناتهم الاتنين كانو كارين وجوليا علي حد علمي ، بعد فترة كبيرة من قعادهم ف البيت ، في واحد دخل وبكل بساطة دبح العيلة كلها ! ، القضية اتقفلت لما ملقيوش القاتل ، البيت سعرو قليل عشان الناس بتتشائم منو ، انا كدا عرفتكو الي كنت عاوز اقولو

رد عليه والدي

- تشاؤم ايه ياراجل بس ، دي كلها خرافات ، منكرش اني سمعت الكلام دا قبل كدا لكن انا هسكن هنا ومش هسيب السعر او الفرصة دي لحد تاني

انتهي الحوار لحد هنا ، بصراحة الكلام دخل من الودن دي وخرج من الودن التانية ، انا شكيت ف الراجل انو بيحاول يبعدنا عن البيت عشان جاب ساكن بسعر اعلي مثلا.

خلوني اقولكم شكل البيت ، البيت دورين ، بسلم خشبي ، فيه تلت غرف ف الدور الي تحت وغرفتين فوق ، طبعا قعدنا قاعدة عائلية وكل واحد اختار قوضتو وف الاخر اتقسمت علي ان انا وايملي هنقعد فوق وبابا وماما وايما هيقعدو تحت ، طلعت عشان اجهز قوضتي ، الساعة كات حوالي 9 بليل ، لكن لمحت ظل طفل وظل راجل معديين من قدام الباب ! ، قولت يمكن بابا اخد ايملي عشان يوريها القوضة بتاعتها ، رجعت كملت تجهيز القوضة.

خلصت ونزلت اتفرجت علي التليفزيون شوية ، لكن الي شد انتباهي ان بابا وايملي لسه منزلوش لحد دلوقتي ، طلعت اشوف فيه حد وانا شايف من تحت الباب ظل ، الباب كان مردود ، فتحت الباب ، لكن ملقتش حد ! ، قولت يمكن نزلو من غير ماخد بالي.

نزلت ورحت اخبط علي القوضة بتاعت بابا وماما ، وفتحت الباب ، لكن لقيت ايملي نايمة معاهم عادي جدا وماما بتحط ايديها علي بوقها عشان مكلمش عشان ايملي متصحاش ! ، استغربت ، لكن قولت يمكن كان بيتهيألي عادي ، بعد ما ايملي راحت ف النوم ماما شالتها وطلعتها قوضتها واكدت عليا قبل مانام ابقي اطمن عليها ، قعدت شوية ع الموبايل وبعدين قررت انام ، قفلت انوار البيت ، طلعت ع السلم ، رحت عشان اطمن علي ايملي واتاكدت انها نامت ، دخلت قوضتي وبدات اروح ف النوم ، صحيت علي صوت خرفشة ف قوضة ايملي ، بصيت ف الموبايل لقيت الساعه 4 الفجر ! ، قومت من النوم عشان اروح اطمن عليها ، رحت ، لكن وانا رايح كنت سامع صوتها بتتكلم مع حد وتسكت شوية كانو بيرد عليها وتتكلم تاني ، فتحت الباب ، لكن ملقتش اميلي ! ، لكن انا عرفت صوت الخرفشة ده جاي منين ، للاسف الصوت كان جاي من الدولاب ! ، استغربت ايه الي مدخلها الدولاب وبتعمل ايه جوا لكن مرة واحدة فتحت الدولاب ولقيتها وبدات ازعق

- انتي ايه الي مدخلك الدولاب مش ده وقت النوم؟

ردت عليا بجملة عمري ماهنساها ، وهي هادية جدا ومبتسمة

= اسفة ، بس كنت بلعب مع كارين وجوليا صحابي !

ساعتها افتكرت كلام الراجل ، وعرفت ان الاسمين دول انا سمعتهم قبل كدا !

يتبع..

الكاتب

‏مصطفي م. ميعاد‏ (‏‎Mostafa M. Mead‎‏)